Starfsþróunarsjóður prófessora

Starfsþróunarsjóður prófessora

Úthlutunarreglur

1. Umsækjendur

1.1 Hverjir eiga rétt á að sækja um styrk hjá Starfsþróunarsjóði prófessora?

a) Rétt til að sækja um styrk úr Starfsþróunarsjóði prófessora hafa prófessorar við ríkisháskóla sem greitt er til sjóðsins vegna. Til að öðlast styrk úr sjóðnum þarf umsækjandi að uppfylla skilyrði um sjóðsaðild samkvæmt reglum sjóðsins þegar til útgreiðslu kemur.

b) Prófessor á eftirlaunum, sem vinnur enn við rannsóknir á vegum háskóla síns, getur sótt um styrk til ráðstefnuferðar í tvö ár eftir að hann fer á eftirlaun.  

c) Ríkisháskólar og stofnanir þeirra geta sótt um styrk úr sjóðnum vegna verkefna sem falla að markmiðum sjóðsins og stuðla að starfsþróun prófessora.

2. Prófessorar við ríkisháskóla

2.1 Styrkhæf verkefni

Markmið Starfsþróunarsjóðs prófessora er að styðja við markvissa starfsþróun prófessora við ríkisháskóla. Verkefni eru því eingöngu styrkhæf ef þau varða starf eða fagsvið umsækjanda, svo sem vegna kostnaðar sem stafar af:

1. Ráðstefnugjöldum
2. Skóla- eða námskeiðsgjöldum, þar með talið námskeiðum sem tengjast kennslu, rannsóknum, stjórnun, tungumálum, upplýsingatækni eða annarri starfsþróun sem varðar starf eða fagsvið umsækjanda
3. Námsgögn sem tilgreind eru í kennsluáætlunum/bókalistum í styrkhæfu námi
4. Rannsóknamisserum og námsleyfum þar sem viðkomandi vinnuveitandi greiðir ekki allan ferðakostnað
5. Rannsóknasamstarfi við háskóla, rannsóknastofnanir eða aðra faglega samstarfsaðila
6. Þátttöku í formlegum fundum fagfélaga, alþjóðlegra samtaka, rannsóknarneta eða annars faglegs samstarfsvettvangs, ef þátttakan varðar starf eða fagsvið umsækjanda
7. Öðrum útlögðum ferðakostnaði, m.a. flug- og lestarfargjöldum og/eða aksturskostnaði, hótel- og gistikostnaði. Undir þennan lið falla innanbæjarsamgöngur, s.s. rúta, bílaleigubíll, lestarferðir, leigubílar og bílastæðagjald þegar um er að ræða ferð til og frá lokaáfangastað, t.d. flugvelli eða lestarstöð, til endanlegs gististaðar. Hámarksgreiðslur vegna slíkra innanbæjarsamgangna er kr. 5000 fyrir hvora ferð. Akstur innanlands með eigin bifreið eða bílaleigubíl er að jafnaði styrktur að hámarki sem nemur lægsta fargjaldi almenningssamgangna á sömu leið, nema sérstakar aðstæður réttlæti annað. 
8. Fyrir ferðir til og frá Keflavíkurflugvelli frá höfuðborgarsvæðinu er greitt fast gjald sem samsvarar gjaldi í flugrútu, sé þess óskað. Ekki er þörf á kvittun. 

Gistikostnaður er eingöngu styrkhæfur vegna þeirra gistinátta sem tengjast beint styrkhæfu verkefni, það er nóttina áður en verkefni hefst, nætur meðan verkefni stendur yfir og nóttina eftir að því lýkur. Stjórn sjóðsins getur þó tekið tillit til eðlilegra ferðadaga, tímamismunar, fjarlægðar, flugframboðs eða annarra málefnalegra aðstæðna þegar metið er hvort gisting teljist nauðsynleg vegna verkefnis.

Ekki er styrkhæft:

1. Samgöngur innan borga eða sveitarfélaga, að undanskildum ferðum milli flugvallar og lokaáfangastaðar.
2. Fæðiskostnaður, þar með talið morgunverður sem er sérstaklega tilgreindur á hótelreikningi. Sé tekið fram að morgunverður sé innifalinn í gistiverði án þess að verð hans sé sérstaklega tilgreint, skal draga 2.000 kr. frá styrkhæfum kostnaði fyrir hvern dag sem morgunverður er innifalinn.
3. Launatap
4. Kostnaður vegna tómstundanámskeiða, sjálfsræktarnámskeiða, sjálfstyrkingarnámskeiða eða meðferða sem tengjast ekki starfi eða fagsviði umsækjanda
5. Skoðunarferðir, skemmtiferðir eða almennar kynnisferðir án skýrs faglegs inntaks
6. Ferðir vegna þátttöku í doktorsvörnum.
7. Kostnaður sem hefur þegar verið greiddur eða endurgreiddur af vinnuveitanda, öðrum sjóði eða þriðja aðila
8. Sá hluti fargjalda eða annars kostnaðar sem greiddur er með vildarpunktum, inneignum eða annars konar viðskiptavild. Undanskilið er ef umsækjandi kaupir gjafabréf í flug á afslætti og sýnir fram á greiðslu þess.

Sjóðsstjórn metur vafatilvik.

2.2 Styrkfjárhæð

Hámarksupphæð styrkja til einstaklings er 600.000 kr. á hverju almanaksári. Miðað er við það ár sem verkefni eða ferð fer fram, óháð því hvenær styrkur er greiddur út.

Aldrei eru greiddir hærri styrkir en sem nemur framlögðum og styrkhæfum kostnaði.

Hámarksstyrkur tekur mið af starfshlutfalli umsækjanda. Umsækjandi í hlutastarfi getur að hámarki fengið styrk í hlutfalli við starfshlutfall, nema stjórn sjóðsins ákveði annað á grundvelli sérstakra aðstæðna. Í tilfelli prófessora á eftirlaunum er miðað við starfshlutfall við starfslok.

Ef sjóðsþurrð verður eða sjóðurinn stendur illa að mati stjórnar, sé tekið mið af tekjum hans og fyrirsjáanlegum fjárhagsskuldbindingum, getur sjóðsstjórn ákveðið að lækka styrki, fresta greiðslum eða forgangsraða umsóknum. Við forgangsröðun skulu þeir að jafnaði njóta forgangs sem ekki hafa áður fengið styrk eða hafa fengið lægri styrki úr sjóðnum.

2.3. Umsókn og greiðsla styrks

1. Umsókn um styrk: Umsóknareyðublöð ásamt upplýsingum um reglur sjóðsins eru aðgengileg á heimasíðu Félags prófessora við ríkisháskóla. Vanda skal frágang umsóknar. Í umsókn skal tilgreina með hvaða hætti umsækjandi hyggst verja styrknum, hvernig verkefnið tengist starfi eða fagsviði umsækjanda og aðrar upplýsingar sem óskað er eftir á umsóknareyðublaði. Umsækjandi skal upplýsa í umsókn hvort sótt hafi verið um eða fengist styrkur frá öðrum aðila vegna sama verkefnis eða sama kostnaðar. Ef umsókn lýtur að endurgreiðslu kostnaðar í erlendum gjaldeyri skal umsækjandi sýna fram á hver sá kostnaður hafi verið í íslenskum krónum, til dæmis með greiðsluyfirliti eða skjáskoti úr banka.
2. Reikningar og greiðslukvittanir: Greiðslur úr sjóðnum fara að jafnaði fram gegn framvísun reikninga og greiðslukvittana. Gögn þurfa að vera læsileg og sýna fjárhæð, greiðanda, dagsetningu, tilefni kostnaðar og að kostnaður hafi verið greiddur. Útborgun styrks á sér að jafnaði ekki stað nema sýnt sé fram á með fullnægjandi gögnum að viðkomandi kostnaður hafi fallið til og verið greiddur. Bókunarstaðfesting, farseðill eða e-miði telst ekki einn og sér fullnægjandi greiðslustaðfesting ef ekki kemur fram að greiðsla hafi átt sér stað.
3. Staðfesting á verkefni: Auk reikninga og greiðslukvittana þarf að sýna fram á að styrkurinn mæti kostnaði við það verkefni sem umsóknin tengist, svo sem með dagskrá, þátttökulista, ráðstefnustaðfestingu eða annarri staðfestingu frá skipuleggjanda. Staðfesting þarf að koma frá öðrum aðila en umsækjanda sjálfum. Við umsókn vegna rannsóknasamstarfs eða rannsóknamisseris getur stjórn sjóðsins óskað eftir staðfestingu frá samstarfsaðila, gestgjafastofnun, viðkomandi háskóla eða öðrum óháðum aðila.
4. Skilafrestur og útborgun styrks: Umsókn um styrk skal berast sjóðnum innan árs frá lokum verkefnis. Með lokum verkefnis er átt við að ráðstefnu, námskeiði, ferð, rannsóknasamstarfi eða öðru verkefni sé lokið. Fullnægjandi umsóknir skulu að jafnaði afgreiddar mánaðarlega. Framkvæmdastjóra eða starfsmanni sjóðsins er heimilt, samkvæmt nánari ákvörðun stjórnar, að afgreiða einfaldar og óumdeildar umsóknir milli stjórnarfunda ef þær falla skýrt undir reglur sjóðsins, öll nauðsynleg gögn liggja fyrir og fjárhagsleg heimild er til staðar. Afgreiðslur sem fara fram milli stjórnarfunda skulu lagðar fram til kynningar eða staðfestingar á næsta fundi stjórnar. Félagsmaður sem ekki hefur skilað fullnægjandi gögnum fyrir lok skilafrests á ekki rétt á að umsóknin verði afgreidd í fyrstu úthlutun á eftir. Þegar styrkur hefur verið greiddur inn á bankareikning umsækjanda er afgreiðslan tilkynnt honum með tölvupósti.
5. Tvígreiðsla eða ofgreiðsla styrks: Ef mistök verða við afgreiðslu styrkumsóknar eða greiðslu styrks skal leiðrétta þau eins fljótt og unnt er. Ef umsækjandi hefur fengið tvígreiddan styrk, ofgreidda styrkupphæð eða ef síðar kemur í ljós að sami kostnaður hefur verið greiddur eða endurgreiddur af öðrum aðila, ber honum að tilkynna sjóðnum það og endurgreiða hina ofgreiddu fjárhæð.
6. Upplýsingar til skattyfirvalda: Í byrjun hvers árs eru sendar upplýsingar til skattyfirvalda þar sem gerð er grein fyrir styrkþegum og styrkupphæðum síðastliðins árs, eftir því sem lög og reglur gera ráð fyrir. Styrkþegar bera sjálfir ábyrgð á framtalsskilum og skattalegri meðferð styrkja.

2.4 Hlé eða rof á sjóðsaðild

1. Fæðingarorlof og foreldraorlof: Sjóðfélagar halda rétti sínum í fæðingarorlofi og foreldraorlofi samkvæmt reglum sjóðsins, enda sé greitt félagsgjald eða iðgjald vegna þeirra á orlofstímabilinu eftir því sem við á.
2. Atvinnuleysi. Sjóðfélagar sem orðið hafa atvinnulausir geta sótt um og fengið styrk úr sjóðnum í 12 mánuði eftir að til þess kemur, hafi þeir átt aðild að sjóðnum í a.m.k. eitt ár.
3.  Launalaust leyfi: Sjóðfélagi í launalausu leyfi á rétt á styrk samkvæmt reglum sjóðsins fyrstu sex mánuði leyfisins, að öðrum skilyrðum uppfylltum. Sjóðfélagi skal skila inn með umsókn staðfestingu frá vinnuveitanda um launalaust leyfi ef óskað er eftir því.
4. Annað rof á aðild: Stjórn sjóðsins ákveður hverju sinni hvort og hvernig meta skuli eldri sjóðsaðild til að brúa rof á aðild. Rof á aðild getur þó aldrei verið lengra en fjórir mánuðir nema sérstakar aðstæður mæli með öðru.

3. Ríkisháskólar og stofnanir þeirra

3.1 Aðild

Ríkisháskólar og stofnanir þeirra geta sótt um styrk úr Starfsþróunarsjóði prófessora vegna verkefna sem falla að markmiðum sjóðsins og taka til starfsþróunar prófessora.

3.2 Styrkhæf verkefni

Verkefni þurfa að falla að markmiðum sjóðsins og stuðla að markvissri starfsþróun prófessora.

Ekki eru styrkt verkefni sem teljast hluti af reglubundnum rekstri háskóla eða stofnunar.

3.3 Styrkfjárhæð

Stjórn sjóðsins ákveður hvaða fjármagni verður veitt í styrki til ríkisháskóla og stofnana þeirra í samræmi við áherslur stjórnar hverju sinni, fjárhag sjóðsins og fjölda umsókna.

3.4 Umsóknareyðublað

Sótt er um á sérstöku eyðublaði á heimasíðu Félags prófessora við ríkisháskóla.

4. Málskotsréttur

Ef umsækjandi er ósáttur við afgreiðslu sjóðsins á styrkumsókn sinni og fylgigögnum á hann ávallt rétt á að vísa erindi sínu á ný til stjórnar sjóðsins. Beiðni um endurskoðun skal berast skriflega innan fjögurra vikna frá því að umsækjanda var tilkynnt um afgreiðslu. Verður afgreiðslan þá tekin upp á næsta fundi stjórnar eða eins fljótt og unnt er.

5. Gildistökuákvæði

Reglur þessar voru samþykktar í stjórn Starfsþróunarsjóðs prófessora þann 19. ágúst 2026 og stjórn Félags prófessora við ríkisháskóla 21. ágúst 2026 og taka gildi frá þeim tíma. Á sama tíma falla eldri úthlutunarreglur sjóðsins úr gildi.

Skilyrði fyrir styrkveitingum úr Starfsþróunarsjóði prófessora

• Styrkir eru aðeins veittir að ferð lokinni.
• Gerð er krafa um vandaðan frágang umsókna.

Þegar sótt er um styrk:

• Sótt er um með rafrænum hætti á heimasíðu félagsins. Fylgigögnum er hlaðið upp með umsókninni. Athugið að hægt er að skanna mörg skjöl saman í eitt skjal og hengja með umsókn.
• Aðeins skal sækja um styrk vegna einnar ferðar í hverri umsókn.

Fylgigögn með umsókn:

• Sundurliða þarf allan útlagðan kostnað. Bæði í erlendri mynt og íslenskum krónum.
• Allir reikningar verða sannanlega að vera greiddir af umsækjanda.
• Staðfesting á greiðslu.
• Afrit (pdf) af frumreikningum vegna útlagðs kostnaðar. Þetta á við um allan útlagðan kostnað, t.d. flugfarseðla, hótel, ráðstefnugjöld, lestir o.fl. Athugið að bókunarstaðfestingar vegna flugs og hótela eru ekki gildir reikningar.
• Brottfararspjöld verða að fylgja umsókn ef sótt er um styrk vegna flugkostnaðar.
• Staðfesting á þátttöku ef sótt er um styrk vegna ráðstefnuferðar.
• Staðfesting frá viðkomandi háskóla auk sundurliðunar á öllum kostnaði, ef sótt er um styrk vegna rannsóknamisseris.

Meðal þess sem ekki er styrkhæft:

• Fæðiskostnaður. Þegar sótt er um styrk vegna hótelkostnaðar þá er aðeins veittur styrkur fyrir gistingunni. Falli til annar kostnaður vegna hótelgistingar þarf umsækjandi að draga hann frá.
• Bílaleiga.
• Bílastæðagjöld.
• Samgöngur innan borga.
• Félagsgjöld.

1. grein
Heiti

Starfsþróunarsjóður prófessora er starfræktur á grundvelli bókunar 2 með kjarasamningi fjármálaráðherra f.h. ríkissjóðs og Félags prófessora við ríkisháskóla, sem undirritaður var 7. október 2011.

2. grein
Aðsetur

Aðsetur Starfsþróunarsjóðs prófessora er í húsakynnum Félags prófessora við ríkisháskóla, eða eftir nánara samkomulagi aðila. Kennitala sjóðsins er 431111-0630.

3. grein
Stefna og hlutverk

Markmið Starfsþróunarsjóðs prófessora er að bæta möguleika félagsmanna til að sækja ráðstefnur, sinna rannsóknum og auka möguleika til rannsóknasamstarfs. Enn fremur er það markmið sjóðsins að styðja skóla og stofnanir þeirra til að gera prófessorum kleift að vinna að verkefnum sem fara saman við markmið beggja.

Starfsþróunarsjóður prófessora sinnir hlutverki sínu meðal annars með eftirfarandi:

• Skapa nauðsynlega yfirsýn yfir sjóði og fjármuni sem ætlað er að auka möguleika prófessora og stofnana til að ná framúrskarandi árangri í starfi sínu og samhæfa virkni sjóða með sambærilegan tilgang.
• Afgreiða umsóknir í sjóðinn.

4. grein
Styrkir

Rétt til að sækja um styrki í sjóðinn hafa prófessorar við ríkisháskóla, ríkisháskólar og stofnanir þeirra. Stjórn sjóðsins setur úthlutunarreglur.

5. grein
Fjármál og tekjur

Tekjur Starfsþróunarsjóðs prófessora eru:

• Umsamið gjald sem er hlutfall af launum og er sem hér segir: Frá og með 1. júlí 2011 greiðir launagreiðandi mánaðarlega iðgjald sem nemur 0,35% af heildarlaunum þeirra starfsmanna hlutaðeigandi launagreiðanda sem falla undir 1. gr. Iðgjaldið er greitt mánaðarlega eftir á samkvæmt útreikningi launagreiðanda. Frá og með 1. júlí 2012 skal iðgjaldsprósentan nema 0,70%, í stað 0,35% áður.
• Frá og með 1. janúar 2020 er framlagi til Starfsmenntunarsjóðs BHM, samkvæmt grein 10.3.1 í kjarasamningi Félags prófessora við ríkisháskóla, beint til Starfsþróunarsjóðs prófessora að sinni, sbr. bókun 5 í kjarasamningi Félags prófessora við ríkisháskóla.
• Vaxtatekjur.
• Sjálfsaflafé.

Kostnaður vegna reksturs sjóðsins greiðist af tekjum hans.

Fjármuni Starfsþróunarsjóðs prófessora skal ávaxta á þann hátt sem stjórn telur öruggan á hverjum tíma.

6. grein
Hlutverk og starfshættir stjórnar

Stjórn Starfsþróunarsjóðs prófessora er skipuð til tveggja ára tveimur fulltrúum Félags prófessora við ríkisháskóla, tveimur fulltrúum háskólanna og einum fulltrúa fjármála- og efnahagsráðuneytis. Stjórn skiptir með sér verkum.

Hlutverk stjórnar Starfsþróunarsjóðs prófessora er að móta og þróa starfsemi sjóðsins í samræmi við markmið hans. Stjórnin ber ábyrgð á rekstri, fjárhag og eignum sjóðsins.

Stjórn skal funda reglulega, halda gerðarbók og rita í hana samþykktir sínar. Til þess að samþykkt sé lögmæt þarf meirihluti stjórnarmanna að greiða henni atkvæði. Atkvæði formanns ræður falli atkvæði að jöfnu.

Stjórnin skal árlega gera skýrslu um störf sín og senda hana til Félags prófessora við ríksháskóla með afriti til fjármálaráðuneytisins. Reikningsár Starfsþróunarsjóðs prófessora er almanaksárið. Uppsetning ársreikninga og endurskoðun skal gerð af löggiltum endurskoðanda. Ársreikning skal senda til Félags prófessora við ríkisháskóla.

7. grein
Framkvæmdastjóri

Stjórn ræður framkvæmdastjóra Starfsþróunarsjóðs prófessora. Framkvæmdastjóri stýrir hinu daglega starfi og sér um framkvæmd ákvarðana stjórnar. Framkvæmdastjóri ræður aðra starfsmenn í samráði við stjórn.

8. grein
Samstarf við aðra aðila

Starfsþróunarsjóður prófessora getur átt samstarf við aðra aðila og gert við þá samninga til lengri eða skemmri tíma til að vinna að markmiðum og verkefnum sjóðsins.

9. grein
Breytingar á samþykktum sjóðsins

Samþykktum sjóðsins verður aðeins breytt með samþykki stjórnar Starfsþróunarsjóðs prófessora.

10. grein
Slit sjóðsins

Starfsemi Starfsþróunarsjóðs prófessora verður einungis slitið með ákvörðun samningsaðila skv. 1. gr. Verði starfsemi sjóðsins lögð niður skal eignum ráðstafað í samræmi við markmið hans.

Reykjavík, 18. maí 2020

f.h. Félags prófessora við ríkisháskóla